ಗೃಹಲಕ್ಷ್ಮಿ ಹಣದಿಂದ ಫ್ರೀಜ್ ಖರೀದಿ ಮಾಡಿದ ದೇವಲಾಪುರ ಗ್ರಾಮದ ಸುವರ್ಣ ಹಿರೇಮಠ

ಬಾಗಲಕೋಟೆ, ಮೇ 18: ಕರ್ನಾಟಕ ಸರ್ಕಾರದ ಗೃಹಲಕ್ಷ್ಮಿ ಯೋಜನೆಯಡಿ ದೊರೆಯುತ್ತಿರುವ ಹಣವನ್ನು ಉಳಿಸಿಕೊಂಡು ಬಾಗಲಕೋಟೆ ತಾಲೂಕಿನ ದೇವಲಾಪುರ ಗ್ರಾಮದ ಸುವರ್ಣ ಹಿರೇಮಠ ಅವರು ಫ್ರೀಜ್ ಖರೀದಿ ಮಾಡಿದ್ದಾರೆ.

ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಗಳಲ್ಲೊಂದಾದ ಗೃಹಲಕ್ಷ್ಮಿ ಯೋಜನೆಯ ಮೂಲಕ ಮಹಿಳೆಯರ ಬ್ಯಾಂಕ್ ಖಾತೆಗೆ ಪ್ರತಿ ತಿಂಗಳು ₹2,000 ಜಮೆಯಾಗುತ್ತಿದ್ದು, ಈ ಹಣವನ್ನು ಮಹಿಳೆಯರು ಕುಟುಂಬದ ಅಗತ್ಯಗಳಿಗೆ ಬಳಸಿಕೊಳ್ಳುತ್ತಿದ್ದಾರೆ. ಕೆಲವರು ಮಕ್ಕಳ ಶಿಕ್ಷಣ, ಮನೆ ಖರ್ಚು, ಸಣ್ಣ ವ್ಯಾಪಾರ ಹಾಗೂ ಗೃಹೋಪಯೋಗಿ ವಸ್ತುಗಳ ಖರೀದಿಗೆ ಬಳಸುತ್ತಿರುವುದು ಕಂಡುಬಂದಿದೆ. ಇದೇ ರೀತಿಯಲ್ಲಿ ದೇವಲಾಪುರ ಗ್ರಾಮದ ಸುವರ್ಣ ಹಿರೇಮಠ ಅವರು ಯೋಜನೆಯ ಹಣವನ್ನು ಉಳಿಸಿಕೊಂಡು ಫ್ರೀಜ್ ಖರೀದಿ ಮಾಡಿದ್ದಾರೆ.

ಈ ಕುರಿತು ಮಾತನಾಡಿದ ಸುವರ್ಣ ಹಿರೇಮಠ, “ನಮ್ಮಂತಹ ಬಡ ಕುಟುಂಬಗಳಿಗೆ ಸರ್ಕಾರದ ಗೃಹಲಕ್ಷ್ಮಿ ಯೋಜನೆ ತುಂಬಾ ಸಹಾಯವಾಗಿದೆ. ತಿಂಗಳಿಗೆ ಬರುತ್ತಿರುವ ಹಣವನ್ನು ಸ್ವಲ್ಪ ಸ್ವಲ್ಪವಾಗಿ ಉಳಿಸಿಕೊಂಡು ಫ್ರೀಜ್ ಖರೀದಿ ಮಾಡಿದ್ದೇವೆ. ಮನೆಯ ಖರ್ಚಿಗೆ ಸಹಾಯವಾಗುತ್ತಿದೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಸಚಿವೆ ಲಕ್ಷ್ಮಿ ಹೆಬ್ಬಾಳ್ಕರ್ ಅವರಿಗೆ ಧನ್ಯವಾದಗಳು,” ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಶಾಸಕ ಉಮೇಶ್ ಮೇಟಿ ಮಾತನಾಡಿ, “ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಗಳು ಜನರಿಗೆ ನೇರವಾಗಿ ಉಪಯೋಗವಾಗುತ್ತಿವೆ. ಗೃಹಲಕ್ಷ್ಮಿ ಯೋಜನೆಯಿಂದ ಮಹಿಳೆಯರು ಸ್ವಾವಲಂಬಿ ಬದುಕು ಕಟ್ಟಿಕೊಳ್ಳುತ್ತಿದ್ದಾರೆ. ದೇವಲಾಪುರ ಗ್ರಾಮದ ಸುವರ್ಣ ಹಿರೇಮಠ ಅವರು ಯೋಜನೆಯ ಹಣವನ್ನು ಸದ್ಬಳಕೆ ಮಾಡಿಕೊಂಡಿರುವುದು ಇತರರಿಗೆ ಮಾದರಿಯಾಗಿದೆ,” ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಎಸ್.ಎನ್. ರಾಂಪುರ ಗ್ಯಾರೆಂಟಿ ಯೋಜನೆ ಅಧ್ಯಕ್ಷರು, ಜಟ್ಟೆಪ್ಪ ಮಾದಾಪುರ ಗ್ಯಾರೆಂಟಿ ಯೋಜನೆ ಸದಸ್ಯರು, ಬಸವಂತಪ್ಪ ಮೇಟಿ, ಬಲರಾಮ ಪವಾರ್, ಮುದಕಪ್ಪ ಕೊಣ್ಣೂರ, ಶಶಿಕಾಂತ ಪೂಜಾರ, ಮಲ್ಲು ದ್ಯಾವನವರ ಹಾಗೂ ಶ್ರೀಕರ್ ದೇಸಾಯಿ ಉಪಸ್ಥಿತರಿದ್ದರು.